عمرو العزب
عمرو العزب كاتب وكوتش ومدرب متخصص في مجال التعلم السريع ومُعتَمد من مدرسة الدلالات العصبية الدولية وهدفه توفير أفكار وطرق بسيطة لإتقان المذاكرة والتعلم
من زمان وأنا شغوف بتعلم أي حاجة جديدة وبالمذاكرة، كنت بلاقي معظم زمايلي في المدرسة بيذاكروا بالعافية علشان أهلهم بيضغطوا عليهم أو علشان المدرسين ما يعاقبهومش، كنت بستغرب أوي ازاي بيكرهوا حاجة زي كده، بالنسبة لي كنت بحب أخلص المدرسة بدري علشان اروح البيت اذاكر، كنت بحب اعمل جداول ونظام علشان اعرف اذاكر كل مادة كويس واديها حقها، دايماً أصحابي وزمايلي كانوا بيلجأوا لي لما يكون فيه حاجة معينة مش فاهمينها في الحجات اللي بيذاكروها
معظم السنين الدراسية كنت بطلع الأول أو التاني على المدرسة وفي الثانوية العامة طلعت الأول وكان الفرق بيني وبين التاني حوالي 10 %، بالإضافة إني كنت من ال130 الأوائل على الجمهورية اللي من حقهم يروحوا أي جامعة هم عايزنها.
في الجامعة
بعد كده دخلت الكلية ولقيت ان تعليق معظم الدكاترة ان نظام الكلية مختلف عن نظام المدرسة وأن الثانوية العامة معتمدة على الحفظ لكن نظام المذاكرة بتاع الكلية معتمد على الفهم أكتر،
بالرغم من كده قدرت برضه افهم نظام الكلية واعدّل شوية من طريقة مذاكرتي وأخر سنة في الكلية كنت حاصل على تقدير امتياز
ITI
بعد التخرج من الكلية اشتركت في منحة وزارة الاتصالات كانت عاملها لمدة 9 شهور
كان نظام التعليم بتاعها نظام أمريكي مختلف شوية عن النظام اللي كنت متعود عليه وكالعادة المسئولين كانوا بيقولوا أن كل نظام التعليم اللي فات كان معتمد على الحفظ لكن في المنحة دي لازم أكون فاهم كل حاجة كويس أوي علشان انجح فيها، عرفت برضه أفهم النظام الجديد وطلعت برضه الأول على الدفعة بتاعتي
اال الشغل
بعد كده اشتغلت في المجال بتاعي وكنت اول واحد في المكان اللي بشتغل فيه اللي عرف يذاكر لشهادات متخصصة في المجال ويحصل على الشهادات معتمدة، في 2012 ذاكرت لشهادة دولية في المجال بتاعي، الشهادة دي امتحانها صعب أوي وعدد قليل اوي اللي بينجح فيها على مستوى العالم، بالرغم من كده عرفت اذاكرها وانجح في الامتحان بتاعها وكنت من ال 30.000 على مستوى العالم اللي معاه الشهادة دي
اكتشاف شغفي
دورت كتير في الكتب واخدت كورسات علشان اعرف الطرق اللي تخلي التعلم أسهل والمذاكرة تبقى ممتعة ولقيت فيه تطابق كبير بين اللي عرفته واللي كنت بعمله وأنا بذاكر، بس اللي كان دايما شاغل تفكيري ازاي اخلى التعلم يتم بشكل أحسن
بالفعل اخيراً توصلت لطرق ممكن لو طبقتها على أي موضوع عايز اتعلمه أكون متقن للموضوع ده بشكل مناسب في وقت قصير جداً
جربت الطرق دي في تعلم الكتابة وعرفت اكتب 3 روايات في أقل من سنة بالرغم ان قبل كده عمري ما كتبت
جربتها برضه في الخطابة ونجحت اني اعمل حوالي 30 كلمة في خلال سنة منهم حوالي 5 حصلوا على مراكز متقدمة في مسابقات خاصة بالخطابة
بسبب بساطة الطريق دي حلمي اخلى كل الناس تعرفها وتتعلمها وتبقى المذاكرة أو تعلم أي مهارة جديدة عملية سهلة وممتعة ومحدش يذاكر وهو حاسس بقهر أو ضغط تاني
هدفي الأساسي أني اساعدك تتعلم أي حاجة جديدة في أسرع وقت ممكن وبدون أي شعور بالزهق أو الملل